Predchádzajúca kapitola

31. kapitola

O mariben le Midijanenca

1 O RAJ phenďa le Mojžišoske:
2 „Mar le Midijanen vaš oda, so kerde le Izraelitenge. A paľis mereha.“ 3 Akor o Mojžiš phenďa le manušenge: „Pripravinen pes pro mariben le Midijanenca a potrestinen len vaš oda, so kerde le RAJESKE. 4 Andral dojekh izraeliko kmeňos bičhaven andro mariben 1 000 muršen.“ 5 Avke kidle avri 1 000 muršen andral dojekh kmeňos. Savore murša sas 12 000. 6 O Mojžiš len bičhaďa andro mariben jekhetane le rašaha le Pinchasoha, saveske sas dad o Eleazar. O Pinchas pes starinelas pal o sveta veci the pal o maribnaskre trubi. 7 Mukle pes andro mariben pro Midijana, avke sar o RAJ prikazinďa le Mojžišoske, a murdarde savore muršen. 8 Maškar o murdarde sas the o pandž midijaňika kraľa: o Evi, o Rekem, o Cur, o Chur the o Reba. Murdarde the le Balaam, le Beoriskre čhas. 9 Paľis o Izraeliti zaile a odľigende le midijaňike džuvľen le čhavenca, savoro lengro dobitkos, o stadi the lengro barvaľipen. 10 Labarde savore fori, andre save bešenas, the lengre stani. 11 Zaile a odľigende savoro, so pes delas te odľidžal le manušendar the le dobitkostar. 12 Ande len anglo Mojžiš, rašaj Eleazar the anglo Izraeliti andro taboris, so sas pro moabika rovini paš o Jordan pre aver sera le Jerichostar. 13 O Mojžiš, o Eleazar the savore izraelika vodci gele pes lenca te zdžal avri pal o taboris. 14 O Mojžiš choľisaľiľa pro veľiťeľa upral o ezeros the upral o šel, save pes visarenas le maribnastar. 15 Phenďa lenge: „Soske mukľan te dživel savore džuvľen? 16 Leperen tumenge pre oda, hoj o džuvľa gele pal o Balaam. On scirdle le Izraeliten, hoj te aven napačivale le RAJESKE oleha, so pes ačhiľa paš o Peor. Vašoda avľa pro manuša le RAJESKRE e bibach. 17 Akana murdaren dojekhe muršores the dojekha džuvľa, savi pašľiľa le muršeha. 18 Ale le čhajen, save mek na pašľile le muršeha, muken prekal peste. 19 Savore tumendar, ko murdarďa varekas abo pes chudňa le mule ťelostar, ačhena efta dživesa avri pal o taboris. Pro trito the pro eftato džives obžužarena tumen the ole džuvľen, saven zaiľan. 20 Obžužaren savore gada, dojekh cipuňi veca, dojekh kaštuno sersamos the savoro, so hin la kozakra srsťatar.“ 21 O rašaj Eleazar phenďa le muršenge, save pes visarde le maribnastar: „Kada hin o prikazis andro zakonos, so o RAJ diňa le Mojžišoske: 22 O somnakaj, o rup, o brondzos, o cinos vaj o olovos, 23 oda savoro, so na labiľa, pes mušinel te obžužarel andre jag the le žužipnaskre paňeha. A savore aver veci kampel te obžužarel le žužipnaskre paňeha. 24 Pro eftato džives peske rajbinena o gada a avena žuže. Ča akor šaj aven pale andro taboris.“

O Izraeliti peske rozďelinen e korisť

25 Paľis o RAJ phenďa le Mojžišoske:
26 „Tu, o rašaj Eleazar, the o izraelika vodci zgenen savoro, so zaiľan – le manušen the o dobitkos. 27 Rozďelin oda pro duj: jepaš de le muršenge, save sas andro mariben, a aver jepaš okle manušenge. 28 Paľis kide avri olestar, so chudle o slugaďa, o daňe le RAJESKE: po jekhes le pandž šel (500) manušendar, po jekhes le pandž šel bikendar, po jekhes le pandž šel somarendar the po jekhes le pandž šel bakrendar. 29 Le oda avri ole kotorestar, so hino lengro, a de le rašaske Eleazaroske sar le RAJESKRO kotor. 30 Le kotorestar, so sas zailo a dino le okle Izraelitenge, le po jekhes le penda (50) manušendar, po jekhes le penda bikendar, po jekhes le penda somarendar the po jekhes le penda bakrendar. Deha oda le Levitenge, save pes starinen pal o Svetostankos le RAJESKRO.“ 31 A o Mojžiš the o Eleazar kerde savoro avke, sar prikazinďa o RAJ. 32 Savoro, so zaile o slugaďa, sas 675 000 bakre, 33 72 000 dobitkos, 34 61 000 somara 35 a 32 000 pačivale čhaja. 36 O slugaďa chudle 337 500 bakre 37 a lendar dine sar daň le RAJESKE 675 bakre. 38 Chudle 36 000 gurumňa a olestar e daň prekal o RAJ sas 72 gurumňa. 39 Chudle 30 500 somara a olestar e daň prekal o RAJ sas 61 somara. 40 Chudle 16 000 manušen, save sas zaile, a lendar dine le RAJESKE 32 dženen. 41 O Mojžiš oda diňa le Eleazaroske pre hazdľi obeta le RAJESKE, avke sar prikazinďa o RAJ. 42 Oka dujto kotor, so o Mojžiš odďelinďa olestar, so chudle o slugaďa, a dine okle Izraelitenge, 43 sas 337 500 bakre, 44 36 000 gurumňa, 45 30 500 somara, 46 the 16 000 manuša, saven zaile. 47 Ole kotorestar, so sas le Izraelitengro, o Mojžiš iľa dojekhe pendatone manušes the dobitkos a diňa le Levitenge, save pes starinenas pal le RAJESKRO Svetostankos, avke sar o RAJ prikazinďa le Mojžišoske. 48 Paľis avle anglo Mojžiš savore armadakre veľiťeľa 49 a phende leske: „Tire služobňika zgende le muršen, saven ľidžahas. Aňi jekh lendar na chibaľinel. 50 Avke amen anas o somnakune veci – o naramki, o čati, o angrusa, o čeňa the o lancici – le RAJESKE sar obeta, hoj te el odmukle amare bini.“ 51 O Mojžiš the o Eleazar iľa lendar o somnakaj the savore somnakune veci. 52 Savoro somnakaj, so dine o armadakre veľiťeľa le RAJESKE sar hazdľi obeta, sas vaj 190 kili. 53 O slugaďa peske mukle oda, so zaile. 54 O Mojžiš the o Eleazar preile o somnakaj le armadakre veľiťeľendar a ľigende andre le RAJESKRO Svetostankos, hoj peske o RAJ te leperel pro Izraeliti.