17. kapitola
O lav pro Damašek
1 Kada hin o proroctvos pro Damašek:
„Dikh, o Damašek imar na ela foros,
ačhela lestar ča kopa bara. 2 O fori le Aroeroskre ena zamukle,
ena prekal o stadi, so ode pašľona,
a ňiko len na daravela avri. 3 Našľola o ohradzimen foros andral o Efrajim
a o Damašek našavela peskro kraľišagos.
Ola, ko ačhena te dživel andro Aram,
doperena andre ladž avke sar o Izrael,“
phenel o Nekzoraleder RAJ. 4 „Andre oda džives cikňola e slava le Jakoboskri,
leskro thulo ťelos šučola. 5 O Izrael ela sar odi maľa,
pal savi sas e pšeňica
košimen tele a skidľi upre,
ela avke zňičimen sar e maľa
andre dolina Refajim paloda,
sar sas skidlo upre mek the oda,
so ačhiľa pal e žatva. 6 Ačhela lestar ča sikra,
avke sar pro olivovo stromos,
pal savo sas razimen tele o olivi,
duj vaj trin dži upre,
štar vaj pandž pro konarica,“
phenel o RAJ, o Del le Izraeloskro. 7 Andre oda džives pes o manuša mukena pre peskro Stvoriťeľis
a visarena peskre jakha pro Sveto le Izraeloskro. 8 Imar pes na mukena pro oltara,
so kerde peskre vastenca,
na mukena pes pre oda,
so kerde lengre angušta,
aňi pro slupi la Ašerakre,
aňi pro kaďidloskre oltara. 9 Andre oda džives ena lengre ohradzimen fori omukle, bo denašena le Izraelitendar, ena sar o thana zabararde la burinaha the le krakenca. Ňiko ode na bešela. 10 Tu bisterďal pro Del, pre tiro Spasiťeľis,
na leperďal tuke pre tiri zoraľi Skala, so tut chraňinel.
Sadzines tuke o nekfeder sadi,
o viňici, so anďal andral aver phuv! 11 No kajte andre oda džives, sar len sadzineha,
kereha sa, hoj te baron,
a tosara pre aver džives
tuke pučinena avri a kvitňisaľona,
the avke andre žatva na ela so te kidel upre;
ela ča nasvaľiben the bari dukh. 12 Vigos le narodenge, so hučinen,
hučinen sar o zorale vlni!
Vigos le manušenge, so bučinen,
bučinen sar o baro paňi! 13 Kajte o manuša hučinen, sar hučinel o baro paňi;
sar pre lende o Del viskinela, denašena dur;
ena sar o phus,
saves odphurdel e balvaj pro verchi
sar o prachos odphurdlo la zoraľa balvajatar. 14 Rači tumen jekhvareste daravena avri!
Ale tosara imar na ela ňiko!
Kavke doperena ola, ko amen občoraren,
a kada užarel olen, ko amenge len o majetki.