76. kapitola
O Žalmos 76
1 Oleske, ko ľidžal o bašaviben pro strunengro nastrojis. Le Asafoskro žalmos. E giľi. 2 Le Devles prindžaren andre Judsko,
baro hin leskro nav andro Izrael. 3 Andro Jeruzalem hin leskro Stanos,
pro verchos Sion leskro kher. 4 Ode phagerďa o jagale šipi le lukenca,
o šťitos the e šabľa, savore maribnaskre zbraňe. 5 Tu sal slavneder andre tiro švetlos
a šukareder sar o čirlatune verchi. 6 O zorale slugaďa pašľon občorarde
a soven le meribnaskre sovibnaha;
imar ňiko lendar našťi hazdel peskre vasta pre amende. 7 Pre tiro dovakeriben, Devla le Jakoboskro,
o graja the ola, ko upre bešenas, mule. 8 Tu sal oda, RAJEJA, kastar kampel te daral.
Ko šaj paš tute obačhel,
sar sal choľamen? 9 Andral o ňebos diňal te džanel tiro sudos,
e phuv daranďiľa a ačhiľa čhit, 10 sar tu, Devla, ušťiľal upre, hoj te sudzines;
te zachraňines savore strapimen manušen pre phuv. 11 Sar mareha olen, pre kaste sal choľamen,
o manuša tut lašarena;
olen, ko ačhena te dživel pal tiri choľi,
phandeha pašal tu sar koruna. 12 Den le RAJESKE, tumare Devleske, oda, so phenďan!
Oleske, kastar kampel te daral,
mi anen o dari savore phuva, so hine pašal leste. 13 Ov pokorinel le vladaren
a daravel avri le bare kraľen.