2. kapitola

O sasto sikaviben

1 Ale tu, Titus, vaker oda so kampel andro sasto sikaviben.
2 O phureder murša mi en strižbe, važne, goďaver, saste andro pačaben, kamiben the avriľikeriben. 3 A the o phureder džuvľa pes mi ľikeren avke sar kampel olenge so dživen sentno dživipen, te na vakeren o pľetki, te na aven otrokiňi la but moľake. Mi sikaven oda so hin lačho 4 a mi den le ternedere džuvľen goďi hoj te kamen peskere romen the peskere čhaven. 5 O terneder džuvľa mi en goďaver the pačivale, mi starinen pes pal peskere khera, mi en lačhe a mi podden pes peskere romenge, hoj ňikas te na el so te phenel pro Lav le Devleskero. 6 A le terneder muršenge thiš dovaker hoj te aven goďaver andre savoreste. 7 Tu korkoro lenge presikav andre savoreste sar kampel te kerel o lačhipen. Oda, so sikaves, mi el pačivalo the lačho. 8 Oda, so len sikaves, mi en čače lava, pre save ňiko našči ňič phenela, hoj pes te ladžan ola so pre tumende džan, bo na ela len pre tumende so te phenel. 9 O sluhi pes andre savoreste mi podden peskere rajenge, hoj lenge te en pre dzeka: te na odphenen lenge, 10 te na lenge čoren, ale mi presikaven lenge andre savoreste o pačivaľiben, hoj savoreha te šukaľaren o sikaviben pal o Del, amaro Spasiťeľis. 11 Bo o Del sikaďa savore manušenge peskero lačhipen so len šaj zachraňinela. 12 Oda lačhipen le Devleskero amen sikavel hoj te das o bijedevleskeriben the le svetoskere žadosci pestar het, hoj pre kada svetos te dživas andro goďaveripen, čačipen the andre sentňi dar anglo Del. 13 Oda lačhipen amen sikavel te užarel pre oda bachtalo džives pre savo pes mukas, so avela akor sar pes sikavela e slava amare bare Devleskeri the le Spasiťeľiskeri, le Ježišoskeri Kristoskeri. 14 Ov diňa peskero dživipen vaš amenge, hoj amen te cinel avri andral savoro nalačhipen a žužarďa peske amen, hoj te avas leskere manuša, so igen kamen te kerel o lačhipen. 15 Kada len sikav, dovaker lenge a phen lenge pre goďi savora zoraha. Ma domuk, hoj tut vareko te dikhel tele.